骨幹成形士氣提升
今晚續演多場歐國聯比賽，A3組上演榜首重頭戲，「2哥」意大利主場硬撼葡萄牙。意大利經過一輪試陣後，以恩斯治尼為首嘅三叉戟已見雛形；葡萄牙續有王牌基斯坦奴朗拿度（C朗）高掛免戰牌，面對主場特醒嘅意大利唔易踢，意軍小讓平半捧上盤。
（香港開電視77台、有線662及602台周日凌晨3時45分直播）
意大利自從由文仙尼接手後，連熱身賽及歐國聯在內，7場比賽雖然只獲2勝3和2負，成績唔算突出，但經過多場試陣後，前、中、後三線骨幹逐漸成形，後防以一對祖雲達斯守將邦路斯及基亞連尼作重心，中場由佐真奴費路負責串連，前線起用恩斯治尼、費達歷高基艾沙及貝拿迪斯治作為進攻三叉戟。意軍上場歐國聯作客以1比0擊敗波蘭，成功踢對手落B級聯賽之餘，自己亦保持爭逐首名出線機會，士氣及信心大為提升。
雖然祖記前鋒貝拿迪斯治今次因傷未有入選，不過，拉素前鋒恩莫比尼埋門有質素，而且文仙尼夠膽起用新人，今次徵召咗意乙球隊布雷西亞、有「新派路」之稱嘅當拿利、薩斯索羅小將史提芬奴辛斯、卡利亞里前鋒柏禾列迪及賀芬咸鋒將基科等新血，話唔定會有神來之筆。
葡萄牙冇C朗前線欠火
另邊廂，葡萄牙王牌C朗繼續獲「體恤」可以休息，頭2輪分組賽都有入波嘅安達施華傷愈冇耐，狀態未起，另一翼鋒干卡路古亞迪斯亦唔夠弗，前線火力冇保證。現時意大利3戰得4分，落後葡萄牙2分，想爭首名必須全取3分；相反葡萄牙仲有一場比賽在手，就算今場輸波，只要最後一輪主場擊敗篤定降班嘅波蘭一樣可以出線，戰意上恐怕唔及破釜沈舟嘅「藍衫軍」。睇埋往績，意大利過去3次喺主場迎戰葡萄牙全部贏晒，而且3次都冇失波，心理上佔上風，意軍小讓平半捧得過。