歐國聯分組賽進入最後2輪，A4組克羅地亞主場硬撼西班牙。「格仔兵團」自世盃決賽飲恨後表現走樣，相反「狂牛」則突飛猛進，挾近年交鋒格食格，西班牙小讓平半必捧1.85倍上盤！
（有線662及602台周五凌晨3時45分直播）
安歷基用人大膽
克羅地亞世盃獲亞軍後，蘇巴錫及文迪蘇傑等老將退役，隊長莫迪歷等主力亦年屆三十，正因如此，「格仔兵團」喺世盃後表現嚴重下滑，近4戰僅得1勝，單計歐國聯2場只得1和1負，當中包括作客慘吞西班牙6蛋，表現極差，短期內難再上高峰。
另邊廂經歷世盃陣前易帥、16強止步嘅西班牙，改由前巴塞教頭安歷基掌舵，喺大衞施華、恩尼斯達及碧基等老將退役後，安帥大膽起用蘇索、馬高阿辛斯奧等新星，以往嘅「邊緣人」沙奧尼古斯亦獲重用，刮起一股青春風暴，配合老大哥沙治奧拉莫斯，呢隻「狂牛」全面回勇，世盃後4戰獲3勝1負狂轟14球，暫時喺A4組位列榜首，加上近4次對克軍有3勝1負，作客一樣捧得過。