今晚歐國聯A2組重頭戲，榜首比利時主場迎戰冰島。比利時箭頭盧卡古剛告傷愈，預計可以復出攻堅，「渣古」踢親國家隊特別醒神，加上有夏薩特及梅頓斯等好波之人支援，火力強勁，面對一蹶不振嘅冰島，主勝得1.1倍冇乜肉食下，轉捧中位數2.5球嘅大盤更佳。
（有線604及603台周五凌晨3時45分直播）
「渣古」踢國家隊變番戰神
比利時喺今夏獲得世盃季軍後，狀態持續勇銳，近4戰取得3勝1和，包括歐國聯小組2戰全勝。啱啱好番嘅箭頭盧卡古，雖然喺曼聯表現低迷，畀球迷笑佢係「盧渣古」，但轉戰國家隊就變番「入球機器」，近4場為「歐洲紅魔」披甲入5粒，配合王牌夏薩特、韋素以及射手梅頓斯，比利時近5仗合共入咗12粒，全部都係先開紀錄，火力唔講得笑。
冰島近6場5負狂失17粒，當中有5場更係先失波嗰隊，無復神奇隊球本色，難怪頭3場歐國聯輸晒排包尾，首循環冰島主場對比利時都慘吞3蛋，今次作客更凶多吉少，不過佢哋近兩場國際賽總算入到波，鋒力未至太曳。比利時依家打少1場下同瑞士同得6分，今場只要贏波就可甩開對手，既然主勝賠率偏熱，轉捧大盤仲好。