英美大戰辦告別惹爭議
周五凌晨熱身賽英格蘭坐鎮溫布萊對美國，今仗可謂別具意義，已離開「三獅軍團」成年嘅朗尼意外獲徵召踢告別賽，惹起唔少爭議。呢位英軍「士哥王」今仗第120次為國效力已成焦點，佢喺記者會表露心迹，話唔會有任何要求，領隊修夫基叫佢做乜佢都會聽！
（有線601及661台周五凌晨4時直播）
33歲嘅朗尼除咗係英格蘭近年其中一位最具標誌性嘅球星外，同時亦係英軍一個時代嘅見證者。喺愛華頓初出道時被冠以「神童」之名，2004年歐國盃橫空降世，可惜當年隨住佢喺8強傷出，英軍最終黯然出局，呢次經歷亦成為朗尼英格蘭國家隊生涯嘅一個縮影。
球迷名宿指唔尊重對手
朗尼其後轉投班霸曼聯，喺各球會級賽事獲獎無數，可惜去到國家隊每每令球迷失望。長期擔任英格蘭正印前鋒嘅佢，縱使身邊拍住謝拉特及林柏特等世界級隊友，始終冇獎盃落袋。隨住朗尼喺去年8月23日宣布退出國家隊，專注球會賽事，當年「黃金一代」正式落幕，新一代「三獅軍團」亦喺領隊修夫基帶領下展開新一頁。「月巴」今次獲得徵召，佢坦言冇任何要求，做後備踢一陣都冇所謂：「我同修夫基講，無論佢想我喺呢場比賽做咩，我都會努力完成，因為今次係我最後1次代表國家隊上陣。」不過今次英軍嘅決定，引起唔少球迷及名宿不滿，質疑將國家隊比賽隨便攞嚟作球員告別賽呢種做法，係對國家隊球員身份同對手嘅唔尊重。
征歐特醒 捧美國先入波
無論如何，朗尼都成功將今次熱身賽嘅焦點聚咗落自己身上，難免畀人感覺英格蘭有輕敵之嫌。尤其對手美國經歷失落世盃決賽周嘅慘痛打擊，今場依然有唔少好波之人壓陣，包括基斯甸普列錫同添莫菲韋亞都分別喺頂級歐洲聯賽揾食，實力唔曳，加上美國近3次作客面對歐洲球隊，都反客為主先取得入波，今場隨時一開波就搶韁，為「月巴」告別賽「贈興」，一於捧美國第一隊入球。