贏即出線輸要降班
周日晚歐國聯A4組焦點戰，英格蘭主場同克羅地亞上演生死戰。克羅地亞上仗擊敗西班牙後，令呢場煞科戰成為兩隊「成王敗寇」嘅關鍵賽事，為避免降班，兼勇奪小組出線資格，雙方料會全力搶攻力爭3分，中位數2.5球入球大值得捧場。
（香港開電視 77台、有線602及662台周日晚10時直播）
「格仔兵團」克羅地亞上仗擊敗西班牙之後，令Ａ4組形勢變得格外緊湊，賽前已經踢晒4場比賽嘅西班牙雖然得6分暫居首位，不過各得4分嘅英格蘭同克羅地亞，只要喺呢場生死戰贏到波，就可以壓倒西班牙搶得出線資格，相反輸波嗰隊就會包尾降班。
如果比賽和局收場，咁邊隊降班？由於英格蘭首循環作客0比0悶和克羅地亞，如果今場再出現同樣比數，對賽成績相同嘅情況下，克羅地亞就會衰得失球較差而降班。不過如果係有入波嘅和局，英格蘭就會因較少對賽作客入球降班。
雙方射手近況都勇
無論如何，近期走勢唔錯嘅「三獅軍團」，攻力絕對有番咁上下，尤其般尼茅夫前鋒哥林威爾遜，首次入選就喺處子騷入波，成為英軍頭號射手哈利卡尼之外又一得分能手。而「格仔軍團」雖然有中場大將拿傑迪錫受傷倦勤，不過比列錫同列比錫等進攻好手狀態神勇，喺核心莫迪歷帶領下，有力同英格蘭上演入球騷，中位數2.5球入球大唔好走寳。