今晚歐國聯B4組煞科戰，丹麥喺主場迎戰愛爾蘭。丹麥已肯定升班，今仗隨時收起基斯甸艾歷臣等主力，而愛爾蘭篤定降班，戰意成疑，兩隊鬥hea格局，唔慌多波入，2.5球細盤乃不二之選。
（有線618台周二凌晨3時45分直播）
例行公事收起主力
隨住丹麥上仗作客以2比1擊敗威爾斯，依家以7分位列榜首，領先打晒4場嘅「2哥」威爾斯1分及包尾愛爾蘭6分，提早一輪鎖定首名獲得升班，今仗勝負已無關痛癢，主力基斯甸艾歷臣、尤素夫保臣或會被收起，出副選點都爭啲。丹麥不嬲都守強攻弱，靠晒艾歷臣穿針引線，若果呢位熱刺中場唔出，火力進一步受削。
另一邊廂，只得1分嘅愛爾蘭，已篤定包尾兼降班，今仗對佢哋嚟講同屬例行公事，唔慌有戰意。呢支英倫球隊都係識守唔識攻，從近3仗都冇波入、只失1粒，可見一斑。老實講，今場毫無競賽意義，相信大家會堅錫身唔會搏，鬥hea到完場交差算數，捧細盤最上算。