主場雪恥 Vs 力爭出線
歐國聯A1組周二凌晨上演煞科戰，德國主場迎戰荷蘭。荷蘭於今屆歐國聯愈戰愈勇，今場只要唔輸便可取得首名出線；德國雖已篤定降班，但主場出擊相信亦唔會畀宿敵輕鬆過關；兩軍近年交手經常合演入球騷，首選2.5球嘅大盤。
（有線662及602台周二凌晨3時45分直播）
荷蘭首場分組賽雖然輸畀法國1比2，不過之後兩場主場成功全取6分，先以3比0擊敗今場對手德國，上場更復仇成功以2比0擊退法國，同時令3戰僅得1分嘅德國提早宣布降班。荷蘭依家以1分落後踢晒4場嘅法國，由於對賽成績荷蘭好過法國，所以「橙軍」只要唔輸畀德國，就可以攞到首名資格出線4強爭標，對連續缺席2016歐國盃、2018世盃兩個大賽決賽周嘅荷蘭嚟講，絕對係一大成就，以目前荷蘭球員信心及狀態，作客形勢唔會輸蝕畀主隊。
近5對賽4次大盤
「日耳曼戰車」經歷失敗嘅世盃決賽周後，轉戰歐國聯表現亦冇起色，其中上次作客荷蘭淨吞3蛋，更係兩軍歷來交鋒德國最大比數敗仗，今返主場當然唔想再失威。德國上場熱身賽喺主場大勝俄羅斯3比0，基拿比、利萊辛尼及夏維斯等小將都有上佳演出，總算為久沉嘅德國鋒線注入生氣。睇番兩軍對上5次交手只有1次打和0比0，其餘4次加埋入咗13球，總入球全開3球或以上，預計今次亦會炮製唔少入波，中位數2.5球嘅大盤最抵玩。