前線凋零冇埋核心
歐國聯各級分組賽進入尾聲，其中周三凌晨B2組煞科戰瑞典主場迎戰俄羅斯。屈居小組第2嘅瑞典，同1哥俄羅斯只差3分，仲有機會爭出線，可惜球隊前場攻力實在疲弱，面對今屆防守表現穩健嘅俄羅斯，瑞典就算主場出擊都難搶分，寧願捧2.5球細盤好過。
（有線618台周三凌晨3時45分直播）
啱啱喺世盃闖入8強嘅瑞典，取得唔錯成績，可惜呢支北歐球隊不嬲踢法唔算進取，大賽後正經歷改朝換代，其中老將托禾倫國家隊退役之後，令到瑞典前場進攻人手更見短缺，尤其負責接棒嘅約翰古達迪，今季發揮唔算出色，仲因為咁喺所屬西甲球會艾拉維斯淪為後備，加上中場核心科斯貝治今次因傷落選大軍，冇咗呢位效力德甲RB萊比錫嘅中場大腦壓陣，瑞典進攻肯定會遇到阻滯。
俄羅斯夠穩以守代攻
況且俄羅斯今屆歐國聯後防踢得夠穩，3場戰罷只失過1球，而且近6次同瑞典交手全開2球或以下，呢場佔盡積分優勢嘅俄羅斯，喺只要打和就可以出到線嘅情況下，肯定會以守代攻，力保小組榜首位置，睇怕瑞典出盡渾身解數都好難攻破俄羅斯防線，細盤好路。