隨着國際賽賽期再開，新開嘅歐洲國家聯賽戰火又再重燃。眾所周知，作為頂級球員，除了要面對各大球會級盃賽聯賽，仲要代表各自國家隊應付世盃或歐國盃外圍賽賽事，密密麻麻嘅賽程，肯定令到一班頂級球員嘅體力爆晒廠，如今再加設呢項新興嘅歐國聯賽事，對佢哋嘅體能絕對會造成進一步嘅消耗，所以我個人認為呢項比賽本身存在不合理性，更預期不出兩三年後，歐國聯甚至就有遭到淘汰的可能性。
意葡大戰可觀性減
有見及此，唔少傳統歐洲國家隊勁旅，喺歐國聯呢項賽事都會刻意收起大牌球星，等佢哋抖抖，寧願起用國內二三線球員應戰，冇咗球星助陣比賽叫座力明顯受影響，球迷睇波嘅意欲都肯定大減，相信只有逢波必賭嘅賭仔願意關注。就好似周日凌晨上演嘅意大利主場鬥葡萄牙嘅A3組大戰，齋睇對戰雙方都會以為係重量級戲碼，不過葡萄牙就有頭號球星C朗再次避戰，連大軍名單都未有入選，即刻影響賽事嘅可觀性。況且踢少1場嘅葡萄牙以6分暫列小組首名，佔盡晉級主動權，呢場面對意大利打和都出線嘅情況下，一班球員未必會踢得太進取，睇好兩隊最終悶和收場。