東南亞錦標賽賽B組今晚爆發榜首大戰，菲律賓主場硬撼泰國。雖然兩軍目前同樣兩戰贏晒，但泰國狂轟11粒堅有霸氣，加上近5次喺東南錦鬥菲律賓贏4次，今仗有力反客為主，客勝有計。
（有線662及602台周三晚7時30分直播）
泰國係歷來東南錦捧盃次數最多嘅球隊，總共攞過5次冠軍，佢哋喺今屆頭2輪分組賽，先係作客狂數東帝汶7粒，然後返主場再以4比2擊敗上屆亞軍印尼，兩場合共喪入11球，火力驚人。特別係前鋒卡拉桑2場個人共轟入7粒，腳風超順，其拍檔施仁湛亦頻有助攻，佢兩個咁弗，今仗勢必成為菲律賓嘅心腹大患。
另一邊廂，菲律賓頭2輪分組賽雖然都擸晒6分，但都係煲魚生粥僅僅熟，首仗全憑比賽末段入波才以1比0險勝新加坡，上場面對弱旅東帝汶，更在一度領先3比0情況下，最終連失2球僅勝3比2，對住魚腩都要失2粒，後防堅唔穩，面對火力全開嘅泰國，難有運行。何況兩軍近5次喺東南錦賽碰頭，泰國取得4勝1和佳績，包括上屆分組賽以1比0擊敗身為主辦國之一嘅菲律賓，今次可再做「惡客」，客勝捧得過。