近3對賽未輸過畀西悉尼
周五下午澳職獨腳戲，西悉尼流浪者將會主場迎戰紐卡素噴射機。噴射機今季聯賽雖然未贏過，不過整體發揮逐漸恢復，加上球隊近期對親流浪者表現特別生猛，呢場有機會搶分，噴射機下盤唔好錯過。
（Now 638、有線614及654台周五下午4時50分直播）
西悉尼流浪者開咧4仗只係贏得1場，表現唔算十分標青，尤其上仗面對下游分子布里斯班獅吼，流浪者喺領先兩球優勢下，竟然畀對手連追兩粒，最終以2比2遭逼和，可見球隊一直以嚟防甩漏問題未有改善，如今一班西悉尼球員洩晒氣，今仗就算主場出擊都好難有明顯優勢。
遇強不敗 有望開齋
上季強勢闖入季後賽決賽嘅紐卡素噴射機，今季踢咗4場，錄得2和2負一般成績，成為目前聯賽3支未開齋嘅球隊之一。雖然開咧表現慢熱，不過噴射機整體實力有番咁上下，近仗曾先後逼和上屆常規賽盟主FC悉尼，以及啱啱喺澳足盃封王嘅阿德萊德聯，睇得出噴射機整體表現同士氣都有所提升。況且噴射機近期面對流浪者表現都有辦有眼，常規賽近3次交手，噴射機都未輸過，今場再鍊過絕對有力搶分，作客嘅噴射機受讓平半，下盤捧得過。