今年最後一個國際賽期結束後，英超重燃戰火，其中一場白禮頓主場迎戰李斯特城。「李城」主席維猜早前不幸喺直升機意外中離世，悲痛過後，期望李斯特城上下無論職球員或球迷，都能盡快重拾心情，繼續踢好波、支持球隊。
想搵高大中鋒支援華迪
李斯特城目前位列第10位，算係不過不失，但場上表現其實唔曳，儘管面對勁旅如曼聯及利物浦都落敗而回，但亦只係分別以1球之差僅負。數據更顯示李斯特城嘅傳中次數係今季至目前為止全英超之冠，達275次之多，場均傳中數達23次，惟轉化成入球嘅比率就遠有不及。有見及此佢哋正計劃喺1月嘅轉會窗羅致一名高大中鋒，作為前線第一點去支援占美華迪。
喺成功簽入新前鋒之前，「狐狸」仍有一段路要走，今晚作客白禮頓，進攻主力占士麥迪臣應可趕及復出，以佢哋國際賽期前3場不敗嘅走勢，今仗作客已兩連敗嘅白禮頓，相信有力一勝。
（Now 625周六晚11時直播）