今晚英超1哥曼城出擊作客韋斯咸，「錘仔幫」一向神經刀，喺箭頭阿拿奧杜域腳風欠順下，迅速打回原形，撞正氣勢如虹兼例必搶韁嘅曼城，半場都頂不住，一於捧1.6倍半場客勝。
（Now 621周六晚11時直播）
「藍月亮」曼城近期勒都勒唔住，聯賽連盃賽在內近7場全勝，對手仲包括曼聯及熱刺等勁旅，喺阿古路、加比爾捷西斯、大衞施華及史達寧輪流發威下狂轟26球，火力驚人，而且主帥哥迪奧拿力主先發制人，呢7場勝仗全部上半場已經領先，由頭贏到尾，非常搶韁，相信今場亦會喺初段搶攻，盡早鎖定勝局，畢竟球隊下周歐聯要作客里昂，早啲奠定勝局就可以畀主力休息。
韋斯咸頹爆打回原形
韋斯咸經歷早前一段「小陽春」後，近6場僅得1勝，再次打回原形，好大原因係奧地利國腳阿拿奧杜域腳風欠順，近5場僅入1球，而「小豌豆」查維亞靴南迪斯亦不受重用，連同耶莫蘭高、山齊士摩蘭奴提早收咧及韋舒亞受傷，加上中場辛迪加斯要坐波監，可謂雪上加霜。曼城作客韋斯咸近年都係「大蝦細」，近3次贏晒仲係半場領先，不論近況同往績都支持半場客勝，有買趁手。