熱刺兼顧歐聯傷兵又多
國際賽完結後，球迷焦點又落番去各大聯賽度。今晚英超上演「倫敦打吡」，車路士作客溫布萊火併熱刺。車仔今季喺新帥沙利執教下仍保持不敗，除教頭有料到外，最大優勢就係唔使踢歐聯，情況同前季捧盃相似；反觀熱刺傷兵多兼有疲態，嚟緊周中又要踢歐聯生死戰，有後顧比較輸蝕，平手盤捧車仔為妙。
（Now 621周日凌晨1時30分直播）
熱刺陣中大部分均為國腳，而且仲係國家隊主力，征戰完世盃後基本上冇乜點休息過，熱刺兵源唔算充裕之餘，今夏更冇重點收購，球員疲累在所難免，加上陣中傷兵唔少，好似捷比亞、迪比利、丹尼路斯、達雲臣山齊士及維頓漢等中後場球員先後受傷，所以今季踢來唔及上季咁爽，喺9月國際賽檔期後，熱刺錄得兩連敗，10月國際賽檔期後對韋斯咸亦陷於苦戰，之後歐聯亦失分，故今次經過國際賽洗禮後情況並唔樂觀。
事實上熱刺今季踢硬仗表現麻麻，即使主場亦唔見得有咩優勢，今季先後不敵曼城及利物浦，由於熱刺新主場預計要到明年2月先可以啟用，變相令主場優勢大減，事關一眾車仔球員對溫布萊球場相當熟悉，上季車仔就曾喺呢度以2比1擊敗熱刺。
「夏世三」弗爆必有貨交
車路士今季喺沙利領軍下已保持18場不敗，當中包括12場聯賽，全因佢哋「降呢」踢歐霸耗力唔多，可專注聯賽。車仔陣中雖同樣多國腳，但兵多將廣有近兩隊人可用，調動上較靈活，「夏世三」夏薩特今季長期弗爆，英超上陣11場貢獻7個入球同4個助攻，平均每場可供應1個入球，加上佢哋近8次作客獲7勝，勝率奇高，有力反客為主。