蘇拿利接手贏到開巷
今晚西甲頭場全面復甦嘅「銀河艦隊」皇家馬德里作客伊巴。自從蘇拿利中途接手掌舵後，皇馬贏到開巷，唔好話個輸字，連個和字都唔識點寫，而且要為莫迪歷爭金球獎造勢，撞正「私房菜」伊巴仲唔起筷咩，直取讓球客勝。
（Now 632周六晚8時直播）
經過季初連場敗仗、兼在國家打吡以1比5慘敗畀死敵巴塞後，主帥洛佩特吉喺上月尾冇得留低，本來搵二隊教頭蘇拿利頂住先，點知呢位球員時代「最佳第12人」愈教愈順，接手後4場贏晒，終於喺月中獲得扶正。呢類巨型班球員聽話緊要過戰術了得，依家班大帝明顯都服晒蘇帥，睇嚟仲有排贏。
爭大捷為「魔笛」造勢
至於《法國足球》雜誌舉辦嘅金球獎，將會喺下月3日揭曉，據報《法國足球》工作人員已經去咗馬德里，相信都係皇馬中場莫迪歷、後衞華拉尼同馬體會前鋒基沙文之爭，後兩者為法國捧走世盃，啱啱獲《GQ》雜誌選為年度最佳男運動員嘅莫迪歷都唔好咁老定，始終華拉尼打後衞比較蝕底，相信皇馬會全力為「魔笛」造勢。何況皇馬食慣伊巴，近5次交手贏咗4次，其中3次至少贏2粒，讓球客勝有買趁早。