基沙文發表「大佬論」唔衰得
今晚西甲尾場爆發「兩派大戰」，「3哥」馬德里體育會主場火併榜首巴塞隆拿。馬體會向來硬淨見稱，從來唔驚「技術流」巴塞，王牌基沙文講明留隊係唔想畀美斯騎住，今場梗係要騷哥利，馬體會挾不敗主場兼受讓，讓球主勝咪錯過！
（Now 632周日凌晨3時45分直播）
賽前西班牙傳媒搵咗遠赴西亞搵食嘅兩軍名將沙維同基比分析，沙維預測巴塞贏2比1，而基比強調兩隊風格完全唔同，仲話如果馬體會改踢巴塞式tiki taka打法，唔使旨意奪冠，明撐主帥施蒙尼近幾年奠定嘅硬淨防守、快速反擊戰術。雖然呢招遇上死守對手會「老鼠拉龜」，但對住強隊多數奏效，包括近6次對巴塞3次唔輸，甚有相剋味道。
馬體會王牌基沙文近日透露巴塞今夏曾搵佢過檔，但佢最終拒絕咗，原因係踢得幾好都只係輔助美斯，一世畀人騎住，相反馬體會全隊上下都「十卜」佢，成為呢位法國國腳留隊主因，呢番心迹亦令隊內士氣提升。
「床單兵團」8次主場7勝1和
美斯上一輪對貝迪斯嘅聯賽復出兼省兩粒，但巴塞仍以3比4落敗，防守出現好大問題，今仗仲有中場拿傑迪錫坐波監，令攔截力削弱。相反馬體會有盧卡斯靴南迪斯及迪亞高哥斯達等強悍主力復操，相信可趕及披甲，施蒙尼仲專登加強反搶打突擊嘅訓練，希望逼到「地上最強」有氣冇碇抖。「床單兵團」今季各項賽事8次主場出擊，豪取7勝1和未輸過佳績，有得受讓咁筍，必捧讓球主勝。