上期專欄講過，新開嘅歐洲國家聯賽，無論係競賽意義定可觀性都唔算高，又榨乾球員體能，連應屆世盃盟主法國都出唔到線，到底係咪佢哋hea踢？球迷們心中有數。好彩今周英超重燃戰火，今晚仲有7場大戰陪住你，真係正到爆。
白禮頓踢出燒「鴨」味道
最矚目之戰梗係尾場「倫敦打吡」，「3哥」車路士要造訪同市死敵熱刺。查實兩隊現時只係差1分，若果前面嘅曼城同利物浦今晚有乜差池失分，佢哋就可再追近啲，當然呢兩支倫敦勁旅實力旗鼓相當，車仔至今仍保持不敗，預計今仗係困獸鬥，我覺得打和嘅機會都好大。
值得一提嘅，係白禮頓主場對李斯特城，位列第12位嘅白禮頓，算係以蔗渣價錢、踢出燒鴨（比燒鵝差少少）嘅味道，因此只係比佢哋多3分嘅李斯特城，作客情況下絕對不可輕敵，「狐狸」主帥佩爾賽前就動員，要繼續為意外離世嘅班主維猜盡力踢好每一場波，相信會以唔輸為大前提，穩中求勝延續近3仗聯賽不敗走勢。