近況回落作客唔敢冒進
周日晚英超頭場戲碼，般尼茅夫主場迎戰阿仙奴。阿仙奴又要面對「黑色11月」魔咒，今季亦唔例外，「兵工廠」喺最近3場聯賽全部打和，場場都有失波，領隊艾美利首要任務就係穩住後防，相信經過國際賽期嘅調整，作客會先打穩陣波，佢哋今季12場聯賽9次開半場和，不妨再追。
（Now 621周日晚9時30分直播）
阿仙奴之前連盃賽曾經締造11連勝強勢，可惜10月尾開始就受「黑色11月」魔咒纏繞，聯賽3連和夾埋痛失6分，對利物浦和波仲叫情有可原，但對住水晶宮同狼隊都失分，就真係同之前成績有天淵之別。翻查對上4季阿仙奴踏入11月嘅成績，合共踢過21場，只係贏得8場，勝率不足4成，真係唔到你唔信邪。
更不幸嘅係，阿仙奴有後備前鋒韋碧克因傷提早收咧，兩大前鋒奧巴美揚及拿卡錫迪亦受傷患困擾，狀態未回復十足，前者喺10月底對水晶宮士哥之後就未入過波，導致球隊好多時進攻都係「老鼠拉龜」。
般尼茅夫主場極硬淨
主隊般尼茅夫並非善男信女，尤其地頭出擊，近9戰主場取得6勝2和僅1敗，唯一敗仗係喺補時失守以1比2倒輸畀曼聯，雖敗不辱，阿仙奴造訪此地肯定惡踢，喺近況回落下相信唔敢冒進，教頭艾美利應採用留前鬥後策略。再者「兵工廠」今季聯賽有個怪現象，就係半場從未領先過，12輪有9次和波同3次落後，睇嚟佢哋今仗半場都難以領先，半和不妨再追。