雖然今晚賽事唔多，但阿King一樣有筍嘢推介，最有心水係西甲獨腳戲，皇家蘇斯達於主場迎戰切爾達。皇蘇依家唔單止傷兵滿營，連中場指揮官伊拿拉文迪今仗都要坐波監，何況今季「主場不利」，切爾達有新帥效應，有得受讓必捧讓球客勝。
（Now 632周二凌晨4時直播）
兩隊都位列中游，皇蘇今季應該唔記得拜神，開咧後傷兵名單總係水蛇春咁長，雖然有守將阿列斯艾路斯當度同薩爾杜亞復操，但蘇比迪亞、洛迪古斯拿華斯、盧卡辛加利、梅基蘭斯同奧耶沙巴爾仲養緊傷，最弊係中場指揮官伊拿拉文迪黃牌夠數，今仗要自動停賽，冇咗呢位出道時被稱為「新沙比阿朗素」喺中場組織攻守，皇蘇隨時亂晒龍。
新帥領軍唔赦蘇斯達
切爾達近況都唔掂，近8場贏得1場咁大把，高層亦忍無可忍，早前怒炒主帥安東尼奧穆罕默德，搵嚟新帥米基爾卡度素接手，查實呢位教頭10月先畀南特炒魷，咁快就搵到新工，有幾多料就唔知。不過新帥上任總有一段「蜜月期」，而後衞尼斯達阿拿祖傷愈可候命，有助鞏固防守。加上皇蘇今季「主場不利」，開咧後5場主場賽事，只得3和2負未開齋，實在讓唔起有新帥效應嘅切爾達，讓球客勝有計。
串拖連奴平手盤漢堡勝
至於意甲卡利亞里主場對拖連奴，拖連奴主帥馬沙利日前唔舒服要入醫院，幸事後證實冇乜大礙，今仗亦可喺後備席領軍，而拖軍近3次作客卡利亞里贏晒，平手盤有計。（Now 638、有線654及614台周二凌晨3時30分直播）最後係同時間開波嘅德乙，漢堡主場對柏林聯。漢堡今季降班後如虎入羊群，近5場聯賽取得4勝1和弗到震，南韓新星黃喜燦好番抖夠歸隊，主勝有計。