今晚歐聯G組爆發榜首大戰，由「2哥」羅馬主場迎戰「1哥」皇家馬德里。唔好以為今仗和波會攜手出線，如果皇馬失分，隨時有出線危機，今仗造訪「私房菜」羅馬唔會留手，博贏波提早獲首名出線，皇馬小讓平半揀上盤。
（有線661及601台周三凌晨4時直播）
現時兩軍同得9分，就算今場和波亦未能攜手晉級，因為「3哥」莫斯科中央陸軍落後5分，若佢哋今輪贏波而皇馬失分，下輪兩軍交鋒則成為生死鬥，如果咁唔好彩皇馬再輸，就與中央陸軍同得10分，會因對賽成績較差被騎住，當然仲要視乎羅馬對柏辛域陀尼亞嘅賽果，好似講得太遠，一句到尾，皇馬若果失分，即有出局危機，梗係贏咗先喇。
「銀河艦隊」自蘇拿利中途接手後，即連贏4場，可見蘇帥成功整頓內部問題，令眾將同心為他賣命，雖然日前聯賽慘吞伊巴3蛋，但佢早啲知道防守問題所在，好過喺歐聯關鍵戰先知喇，以便作出調整。早前陷入球荒嘅箭頭賓施馬，近5場入4粒，快翼加里夫巴利亦傷愈復出，攻力復整。
格食格往績4連勝
羅馬雖然近況尚可，但仍未改一貫攻強守弱嘅陋習，連續5場有失波，難擋火力全開嘅皇馬。況且「銀河艦隊」近年專剋羅馬，兩軍近4次交手，皇馬贏晒僅失1球，格食格下可反客為主，上盤有計。