H組另一場賽事，曼聯坐鎮奧脫福球場迎戰年青人。喺小組以7分排名第2嘅紅魔，上仗歐聯擊敗強敵祖雲達斯士氣大振，有力乘勝追擊，相反小組賽未贏過波嘅年青人實力認真麻麻，呢場難逃一劫，捧讓球主勝。
（Now 643、有線603及604周三凌晨4時直播）
上輪歐聯作客挑戰祖雲達斯嘅曼聯，喺先落後嘅情況下，最終靠馬達嘅精妙罰球，同對手後衞邦路斯嘅烏龍波，最終以2比1反勝，重燃球隊鬥志。隨住比利時箭頭盧卡古傷愈復出，今仗紅魔前線進攻套路又再多幾瓣，搭住近期愈戰愈勇嘅法國攻擊手安東尼馬迪爾，同上仗聯賽因為要坐波監而抖足全場嘅進攻型左閘勞基梳爾，紅魔絕對有足夠火力，喺主場重演首循環3比0大勝年青人嘅好戲。
年青人中場悍將停賽
今季由附加賽晉級嘅瑞士球隊年青人，縱使喺本土聯賽威到爆，不過去到歐聯正賽面對歐洲頂級勁旅，實力差距即刻表露無遺，小組賽至今未贏過波之餘，2次作客都輸對手2球或以上，加上悍將辛洛高呢場被罰停賽，令年青人失去主力中場屏障，呢場後防線隨時要直接面對紅魔嘅衝擊，寧願捧讓球主勝好過。