今晚繼續上演歐聯分組賽，不過嚟到第5輪，開始失去懸念，好似A組嘅多蒙特及馬德里體育會都差唔多出線，而D組嘅波圖與史浩克04晉級機會高唱入雲，B組巴塞隆拿亦提早出線，只剩下國際米蘭同熱刺爭逐餘下一席晉級資格，因此今晚焦點，無疑落晒喺C組。
C組嘅形勢非常微妙，4隊只係相差1至2分，就算排包尾嘅貝爾格萊德紅星都仲有出線機會，若果佢哋今仗擊敗拿玻里，而另一邊廂巴黎聖日耳門(PSG)對利物浦打和嘅話，甚至會殺上次席添，因此呢組今輪任何賽果，都直接影響每隊嘅出線機會，名副其實係打甩髀。講番重頭戲PSG主場對利物浦，PSG今仗不容再失，但尼馬同基利安麥巴比有傷在身紮住上，未必夠弗，而利物浦客場唔敢亂嚟，我覺得係「和」味濃，不妨買呢組1比1及2比2嘅波膽2串3，既可一路睇好波，又隨時刀仔鋸大樹。
金句：今晚歐聯A、D組冇驚喜，反而C組打甩髀