周四凌晨歐聯B組生死戰，熱刺主場硬撼國際米蘭。小組僅排名第3嘅熱刺，為保住出線機會呢場非勝不可，好在射手哈利卡尼狀態回勇，主場出擊肯定搶攻，不過一味掛住進攻隨時令國米有機可乘，兩隊勢上演對攻戰，中位數2.5球入球大唔好錯過。
（Now 644、有線603及604台周四凌晨4時直播）
先講講B組形勢，榜首嘅巴塞已經提早出線，熱刺落後「2哥」國際米蘭3分之餘，首循環交鋒仲以輸波收場，就算國米呢場打和兼下場落敗，而熱刺下輪擊敗巴塞，追到同國米同分，熱刺都會因對賽成績較差（1和1負）而被淘汰，所以呢場熱刺肯定要全力爭勝。其中頭號射手哈利卡尼近排重拾射門靴，近5次為球隊同國家隊上陣入5球，絕對係球隊搶分嘅保證。
不過熱刺後防隱患依然嚴重，維頓漢、捷比亞同丹尼路斯等主力守將都啱啱傷愈未上力，中堅達雲臣山齊士同中場迪比利仲抖緊，上仗面對車路士雖然贏波，不過都要逼住起用經驗欠奉嘅小將祖安科夫，防線實力一般，呢場如果為搶分傾巢而出，隨時畀國米更多空間打反擊。加上國米前鋒莫路伊卡迪近期腳風都幾順，要應付熱刺後防綽綽有餘。查實熱刺近9場歐聯全開3球或以上，其中失咗15球，明顯攻強守弱，呢場入波肯定唔會少，中位數2.5球入球大值博。