兩王牌傷愈許勝不許和
今晚續演歐聯第5輪分組賽，重頭戲有「死亡C組」巴黎聖日耳門（PSG）主場迎戰「紅軍」利物浦。呢組4隊仲有機會爭出線，現時排第3嘅PSG如果想攞番出線主動權，今場一定要喺紅軍身上全取3分，早前喺國際賽受傷嘅兩大王牌尼馬、基利安麥巴比據報已康復，有望復出攻堅，PSG讓平半，波童捧上盤。
（香港開電視77台、Now 643、有線662及602台周四凌晨4時直播）
C組2個出線席位賽前原本以為只係拿玻里、PSG及利物浦3大名牌之爭，估唔到經過4輪分組賽，來自塞爾維亞嘅貝爾格萊德紅星都有4分，只比同得6分嘅拿玻里與利物浦少2分，PSG就以5分排第3，除非拿玻里、利物浦今輪齊齊贏波提早晉級，否則4隊將要鬥到最後一輪，才可決定出線席位誰屬。
PSG今場輸波有可能提早出局，就算和波亦唔樂觀，事關佢哋落後紅軍1分，無論另一場拿玻里對紅星踢成咩比數，PSG都肯定唔會以小組前2名迎接最後一輪賽事，想出線好大可能要睇人面色，所以今場3分可謂志在必得。早前踢國際賽受傷嘅尼馬及基利安麥巴比上場聯賽都冇上陣，不過據報兩人周一已復操，好大機會趕及復出；卡雲尼上場單天保尊射入靚波助球隊1比0擊敗圖盧茲，狀態亦弗，PSG為攞3分一定出盡法寶強攻紅軍。
利物浦文尼染病鋒力降
利物浦上場分組賽淨吞紅星2蛋，今屆2場作客輸晒兼冇入波，發揮明顯打折扣，而且佢哋今季喺英超先後喺曼城、車路士及阿仙奴身上失分，英聯盃亦被車仔踢出局，對強隊往往被比下去。上次兩軍交鋒，利物浦喺晏菲路亦要苦戰至補時才由羅拔圖法明奴絕殺險勝3比2，實力上冇明顯優勢，加上前鋒沙迪奧文尼賽前染病，上陣成疑，恐對紅軍嘅反擊戰術有一定影響，PSG今場讓平半，波童建議捧上盤。