周四凌晨歐聯A組大戰，馬德里體育會坐鎮主場迎戰摩納哥。小組墊底嘅摩納哥今季走勢曳到爆，尤其聯賽深陷降班區，根本冇額外精力爭歐聯，隨時放棄歐戰專注應付法甲，呢場面對3分志在必得嘅馬體會，難逃大敗嘅命運，細鬼我推薦馬德里體育會上盤。
（有線662及602台周四凌晨1時55分直播）
馬德里體育會賽前同1哥多蒙特都攞住9分，不過就因對賽得失球差不及對手屈居第2，呢場只要佢哋贏到波就可以提前1輪確保出線資格。眾所周知，馬體會主場出擊表現不嬲有保證，上仗喺主力守將高甸同荷西基文尼斯齊齊倦勤嘅情況下，球隊都成功逼和實力超班嘅巴塞，其中前鋒迪亞高哥斯達表現回勇，搶得關鍵入波，呢場有佢搭住法國攻擊手基沙文，馬體會面對狀態疲弱嘅摩納哥，絕對有足夠火力大開殺戒。
主隊讓2球照捧上盤
整體實力不如馬體會嘅摩納哥，今季表現全線崩潰，歐聯至今未贏過波之餘，聯賽都跌落榜下游位置，已陷有降班危機。就連執起球隊教鞭嘅名宿亨利，都用咗成7場波，先勉強喺上仗聯賽靠老將法卡奧射入致勝罰球，艱難搶得上任後首場勝仗，可見球隊齋應付聯賽護級已經搞到頭都大，根本冇能力再分心歐聯，呢場作客馬體會恐怕難逃一劫，所以就算讓2球，細鬼都會照捧馬德里體育會上盤。