英超周五又嚟特別場，有場護級大戰卡迪夫城對狼隊。兩支升班球隊首次喺英超碰頭，固然想贏波攞個彩，可惜兩軍腳頭無靈，每場平均入球不足1球，今場似乎係悶戰居多，捧2.5球入球細瞓醒等收錢。
（Now 621周六凌晨4時直播）
英超賽會為咗疏導球賽，安排一啲冇歐洲賽嘅球隊喺周五場聯賽，此舉係無可厚非，但對於亞洲地區球迷嚟講，呢啲賽事真係雞肋，星期二至四捱夜睇完歐聯同歐霸，周五呢啲戲碼嘅波，除非你係超級球迷，否則真係唔會理。
場均入波唔夠1球
不過唔好睇同唔好賭又係兩回事，畀少少統計數字出嚟，大家就知應該點玩。卡迪夫城13場英超製造11個入球，平均每場射波11.4次，場均入波0.85球，射球成功率只得7.5%。狼隊13場入12球，平均每場射波14.3次，場均入波0.9球，射球成功率只得6.5%，狼隊仲要有2個入波嚟自12碼，可見要呢兩隊由生波創造入波幾咁難。數據話晒你聽，今場入波一定唔會多，買定中位數2.5球入球細，瞓醒覺起身收錢個感覺都幾好嘅。