意甲有場免費波費倫天拿對祖雲達斯，祖記周中歐聯贏波提早入16強，可專心聯賽搏殺，佢哋今季聯賽作客6場全勝，王牌C朗更連續4場有波入，對「紫百合」可反客為主，捧祖記讓半一嘅上盤。（香港開電視77台、Now 638、有線654及614周日凌晨1時直播）
C朗今季轉投祖記後，表現更加八面玲瓏，唔係以往咁齋係入波，好似周中歐聯贏華倫西亞，佢就助攻畀文迪蘇傑入波，老實講以C朗嘅卡士，入波固然威水，即使只係助攻同樣有贏波光環，祖記今季有佢加盟可謂如虎添翼。
費倫天拿兩個月未贏過波
不得不提嘅係，呢名葡萄牙巨星作客發揮更超水準，今季祖雲達斯聯賽作客豪取6連勝當中，最近4場C朗入咗5球，絕對係贏波功臣。主隊費倫天拿近排似乎欠啲運仔，近6戰5和1負，自9月底擊敗阿特蘭大後，足足2個月未贏過波，再者佢哋對住祖雲達斯往績勁曳，近6次交手輸5次，好難撐得落，唔嫌客W得1.49太熱嘅可以捧場，祖記讓半一嘅上盤，似乎更值得一試。