火力冠英超-2未驚過
今晚英超榜首曼城又出擊，坐鎮主場迎戰般尼茅夫。「藍月亮」主帥哥迪奧拿不嬲崇尚進攻，佢哋今季已轟入40球冠絕聯賽，而「般茅」主帥艾迪侯域又深受哥帥影響，踢法堅進取，但要同實力贏幾條街嘅曼城玩鬥攻，猶如自殺盞死快啲，讓球主客和就算曼城讓兩球，照捧讓球主勝。
（Now 621周六晚11時直播）
曼城主帥哥迪奧拿坦承，眼見利物浦今季強勢開局，反而激勵佢哋加多兩錢肉緊，「藍月亮」開咧後13場聯賽，豪取11勝2和未輸過，更狂轟40球，火力冠絕英超，其中6場至少贏4粒，非常厲害。哥帥自2016年入主曼城後，共有21場聯賽轟入4球或以上，比同期任何一隊為多，除咗入咗8粒排射手榜榜首嘅阿古路弗爆外，史達寧、利萊辛尼及大衞施華亦輪流發威有士哥，攻擊點之多，令對手防不勝防。
般茅艾帥堅持進攻如「自殺」
咁啱般茅主帥艾迪侯域勁buy哥帥嘅足球哲學，就算隊波人腳有限，照樣堅持進攻打法，絕不玩龜縮死守，今季聯賽已攻入22球，比位列第6嘅愛華頓及排第7嘅曼聯仲多。不過有利亦有弊，般茅亦失咗18球，係前10球隊中失球第2多球隊，呢種咁進取打法，對住強隊特別輸蝕。翻查紀錄，曼城近3次主場迎戰般茅，全部都至少贏4粒，有辦你睇，同哥帥麾下嘅曼城鬥攻，難有好下場，「藍月亮」挾近10場聯賽贏9場之氣勢，可大炒一場，讓球主勝有計。