今晚英超尾場，曼聯則作客「聖人」修咸頓。曼聯近期復用「渣古」盧卡古擔正掛帥，反令進攻欠缺流暢，亦使狀態大勇嘅安東尼馬迪爾「熄火」，修咸頓護級形勢水深火熱，領隊曉士為保帥位，必定擺鐵桶陣死守搶分，加上兩軍近年碰頭少交收，追中位數2.5球入球細更上算。
（Now 621周日凌晨1時30分直播）
曼聯今季表現時好時壞，早前主帥莫連奴曾改用安東尼馬迪爾、拉舒福特及桑馬達打三叉戟，馬迪爾一度連續5場聯賽有士哥，可惜近期復用盧卡古，佢啲控波甩甩漏漏，影響進攻流暢度，同時亦壓縮馬迪爾嘅活動空間，上場聯賽悶和水晶宮0比0就係最佳例證，周中歐聯對弱旅年青人只靠中場費蘭尼末段入波險勝1比0，鋒線表現令人失望。
修咸頓擺鐵桶陣死守
另一邊廂，上季臨危受命帶領修咸頓護級成功嘅主帥曉士，今季情況更曳，開咧後13場聯賽贏得1場咁大把，單計近8場只得3和5負，現時僅得8分淪落至尾3，有傳啱啱辭任愛爾蘭領隊嘅奧尼爾，準備入主「聖人」，曉士為保帥位，一定要盡力搶分，今場一定擺鐵桶陣死守，搶得1分得1分。兩軍近5次聯賽交手，「紅魔」只得2勝2和1負入得3粒，全開2球或以下，入球細乃不二之選。