為亞冠入場券搏殺
日職今日煞科，焦點落喺來屆亞冠盃席位及護級附加賽資格，直播戲碼有「4哥」北海道札幌岡薩多主場鬥「2哥」廣島三箭。岡薩多今場只要贏波就唔使理會其他戰果，肯定攞到來屆亞冠盃入場券；三箭季尾大崩潰，聯賽6連敗兼狂失12球，士氣蕩然無存，岡薩多讓平半上盤值博。
（有線662及602台周六下午1時直播）
今日9場日職喺下午1點同時間開波，但馬會只有8場受注，冇開盤嗰場係鹿島鹿角主場鬥鳥棲砂岩，呢場波其實關係到兩者爭前3同護級形勢，不過最微妙嘅地方，係兩軍今場只需多取1分便可各自達成目標，所以唔少外國賭波公司都將呢場和波賠率刻意調低，甚至索性唔開盤，以防出現所謂「默契波」。
廣島三箭虎頭蛇尾
講番今場比賽，三箭雖然以2分領先岡薩多，不過如果佢哋今場輸波，同時間排第3嘅鹿角有分落袋，三箭就會跌落第4位，失去亞冠盃參賽資格。三箭今季表現可謂虎頭蛇尾，開季14場聯賽攞到12勝1和1負，曾經喺榜首以雙位數積分大幅拋離其他對手，不過自從世盃決賽周休戰期後，三箭演出嚴重走樣，季尾18場聯賽僅獲5勝，包括近6場全敗，以近期走勢，好難期望佢哋喺關鍵一戰突然回勇。
相反岡薩多臨近季尾愈戰愈勇，除咗近4場聯賽贏3場，對上5場主場亦先後擊敗FC東京、神戶勝利船、鳥棲砂岩及仙台維加泰，士氣、狀態都比三箭好得多，既然薩岡多贏波肯定入前三，目標鮮明，上盤絕對信得過。