澳職周六上演兩場大戰，上季常規賽冠軍FC悉尼及季後賽冠軍墨爾本勝利分途出擊，其中墨爾本勝利喺尾場迎戰「私房菜」西悉尼流浪者，承接聯賽3連勝強勢有力全取3分，主Ｗ大可放心捧場。
（Now 639、有線615及655台周六下午4時50分直播）
勝利自從頭2場聯賽不敵墨爾本城及珀斯光輝後，近3場聯賽全面回勇，先後擊敗紐卡素噴射機、中岸水手及FC悉尼，現時攀升至聯賽榜第2位，最令球迷振奮嘅係今季兩大重點收購都交足功課，本田圭佑今季已交出3入球及3助攻，至於季初因狀態未足、一直缺陣嘅前瑞典國腳托禾倫，上場對FC悉尼亦終於首披勝利戰衣上陣，只係用咗23分鐘就搵到首個士哥，勝利戰力可謂更上一層樓。
西悉尼流浪者開季5場聯賽只係贏過排名比自己低嘅威靈頓鳳凰，其餘4場加埋失7粒，防線表現麻麻，佢哋近7次聯賽對勝利只得2和5負，稱得上係勝利嘅「私房菜」，今場恐怕凶多吉少，勝利主Ｗ值得支持。
中岸水手未開齋難抗悉尼
頭場方面FC悉尼作客包尾大幡中岸水手，FC悉尼新箭頭方祖近8場比賽得1場冇入波，個人暫攻入8球腳風勁順；水手踢完5輪係唯一一支未開齋球隊，後防愈輸愈冇信心，聯賽3連敗加埋失10球，3場總入球全開3球或以上，捧客Ｗ及2.5球嘅大盤隨時雙贏。
（Now 639、有線615及655台周六下午2時35分直播）