今晚早場史特加主場鬥奧格斯堡，史特加新帥韋恩薛亞領軍倒戈，佢喺奧格斯堡成名，曾帶領奧堡殺入歐洲賽，但嚟到史特加似乎未執得掂隊波，球隊仍淪落榜尾，加上近季主場對奧格斯堡都冇本事入波，平手盤寧撐「奧堡」。
（on.cc東網周六晚10時30分直播）
韋恩薛亞喺奧格斯堡取得成功，不過嚟到史特加無法保持，史特加上月中國際賽休戰期搵佢救亡，至今未見起色，除喺南部打吡贏過另一弱旅紐倫堡外，其餘4仗全敗兼零入球，上輪作客就吞利華古遜兩蛋，表現乏善可陳，連前國腳箭頭馬里奧高美斯都話對自己今時今日嘅戰鬥能力有懷疑。史特加今季踢咗12輪聯賽除咗只得8分外，合共只入8球亦係德甲火力最弱球隊，佢哋近3次主場對奧格斯堡都入唔到波，短時間都幾難翻身。
「奧堡」首席射手強勢復出
奧格斯堡近況唔算叻，近3輪只得1分，但球員搶拚積極，陣上觀感唔差。今仗佢哋最大喜訊係首席射手艾費特芬保加臣傷愈復出，呢位冰島箭頭今季受傷患困擾，12輪聯賽只曾上陣6次，但已經有7個入球，並3度當選球隊最佳球員，絕對係「奧堡」取分之匙，事實上「奧堡」至今12輪聯賽入咗20粒，係球會史上喺德甲同期入波最多一季，今晚強陣到訪史特加可坐和望贏。