周日凌晨德甲尾場惡鬥，賀芬咸主場迎戰史浩克04。賀芬咸前場多位攻擊手狀態弗爆，可惜受後防甩漏問題拖累，戰績飄忽，今場面對攻力同樣有番咁上下嘅史浩克04，一於合演入球騷娛樂球迷，中位數2.5球嘅大盤咪走雞。
（on.cc東網周日凌晨1時30分直播）
後備奇兵雷斯尼爾遜瓣瓣有
賀芬咸隊中多位新加盟嘅射手都交出對辦表現，其中最引人注目嘅肯定係英格蘭新秀雷斯尼爾遜，呢位18歲前鋒至今已入6球兼交出6次助攻，可謂賀芬咸嘅進攻靈魂，近幾仗後備上陣都交到貨。最令主帥拿高斯文頭痛嘅反而係防線，上輪聯賽球隊喺取得領先優勢下，居然畀對手哈化柏林多番偷襲得手，只能踢成3比3收場，賀芬咸近8仗聯賽全開3球或以上，往往下半場至少有兩球交收，今晚想睇入波嘅球迷必定滿足。
史浩克04主力前鋒馬克烏夫受傷今仗未能倒戈，但球隊鋒力未受影響，皆因有奇兵史克薛斯基彈出，上仗佢獲少帥泰迪斯高信任首次聯賽擔正，即梅開二度報答主帥嘅信任，今晚兩隊鬥攻格局，中位數2.5球大盤好路。