今晚英超可以講係「打吡之夜」，除咗熱刺對阿仙奴嘅北倫敦打吡，仲有車路士對富咸嘅倫敦打吡及默西賽德郡打吡。先講頭場車路士主場鬥富咸，兩隊聯賽排名差天共地，表面上強弱懸殊，不過車仔喺上場聯賽輸畀熱刺1比3，今季首次輸波之餘，對手屯重兵追擊防中佐真奴費路，令本已不穩嘅中堅大衞雷斯錯漏百出，最大弱點表露無遺，令日後對付車仔嘅球隊可以照辦煮碗。
富咸獲雲尼亞里接手後表現有起色，上場首次領軍即以3比2反勝修咸頓，重燃護級希望。雲帥喺2000至04年期間曾執教車仔，戰績不俗仍被解僱，今次重返史丹福橋為復仇誓必施展渾身解數。車仔今季重攻輕守，近5場聯賽4次開4球或以上，中位數3.5球照捧大盤。
（Now 621周日晚8時直播）
利物浦半場搞掂拖肥
至於尾場默西賽德郡打吡，「紅軍」利物浦主場硬撼「拖肥糖」愛華頓。紅軍今季取得球隊史上最佳英超開局，頭13場聯賽取得10勝3和，只失5球，與曼城並列聯賽失球最少球隊。愛華頓排第6成績雖然唔錯，不過今季聯賽對車路士、阿仙奴及曼聯，只得1和2負，實力拍埋Big6高下立見，利物浦今季13場聯賽有11次先入波，其中9次喺上半場取得領先，加上近4次喺晏菲路主場出戰默郡打吡，取得3勝1和之餘，其中3場更在上半場領先，今場主Ｗ僅得1.28倍冇肉食，不如改敲半場主勝。
（Now 621周一凌晨零時15分直播）