屈福特打回原形
英超周中開快車，周三凌晨重頭戲榜首曼城作客鬥屈福特。「大黃蜂」屈福特經過季初蜜月期後已打回原形，相反「藍月亮」曼城愈贏愈有，聯賽6連勝狂轟22球，而且曼城近6次對屈福特有5次至少贏2球，作客讓球半、兩球照捧上盤。
（Now 621周三凌晨4時直播）
屈福特開季4連勝曾被視為今季一路奇兵，可惜自從被曼聯打破不敗身後，戰績開始走下坡，除咗近4場聯賽1和3負，早前主場仲輸過畀同級球隊般尼茅夫0比4，今次對住Big6曼城相信更惡啃。相反曼城今季喺英超順風順水，開季14場聯賽只喺狼隊、利物浦身上失過分，其餘12戰全勝加埋入42球，平均每場入3球有多，進攻火力驚人。
近2季大黃蜂吞城11蛋
曼城上場對般尼茅夫雖有阿古路受傷、大衞施華休息，不過整體發揮未受影響，當另一位箭頭加比爾捷西斯狀態都唔好，後上嘅史達寧、利萊辛尼、馬列斯甚至貝拿度施華都足以分擔入球責任，全民皆攻令對手防不勝防。睇埋往績，曼城對上6次喺英超對屈福特全部贏晒，當中有5次淨勝2球或以上，包括對上2季作客大炒6比0及5比0，足證喺哥迪奧拿嘅帶領下，曼城級數高屈福特幾班，今場曼城讓球半、兩球都冇有怕，一於照捧上盤。