18場不敗唔赦熱刺
今晚英超上演兩場打吡大戰，其中北倫敦打吡阿仙奴主場對熱刺；兩隊係世仇唔使多講，雖然近年熱刺排名已趕過「兵工廠」，但對賽上阿仙奴仍食住對手，保住北倫敦一哥呢塊金漆招牌，今晚主場出戰開出平手盤，樂比認為阿仙奴可看高一線。
（Now 621周日晚10時05分直播）
阿仙奴視熱刺為死敵，故每次碰頭都分外落力，當中近25次主場對熱刺僅輸1場，同時兵工廠亦係連累熱刺於英超歷史上失分最多嘅對手。雖則話熱刺近年進步神速，不過之前對住雲格領軍後期嘅阿仙奴，依然佔唔到任何甜頭，上季喺酋長球場便以0比2落敗。
雖然話數據係用嚟打破，不過阿仙奴應付呢場波明顯花咗唔少心機，最明顯就係上周中歐霸收起晒成隊正選，派尼基迪亞、韋洛克及史密夫路維等新仔落場吸取經驗，擺到明留力踢今場硬仗，難得係佢哋作客烏克蘭依然能夠3球淨勝對手，將不敗場次延續至18場，取得14勝4和，阿仙奴已經好耐冇試過咁威，連所謂嘅「黑色十一月」魔咒都克服埋，可見艾美利時代嘅阿仙奴比過往進步不少。
打吡戰多入波要埋大盤
當然，熱刺近期嘅氣勢亦相當強，聯賽同盃賽加埋已6連勝，不過佢哋近期接連硬仗，繼上周聯賽硬撼車路士後，上周中歐聯生死戰又鬥完國米，連踢3場硬嘢絕對唔易應付，相比起留晒力嘅阿仙奴確實有啲輸蝕。
雖然樂比今場睇好阿仙奴，但有一點值得留意，阿仙奴近22次主場對熱刺都有入波，而熱刺亦有一位阿仙奴剋星，就係近7次聯賽對兵工廠射入7球嘅神鋒哈利卡尼，所以樂比預期今場波有機開大盤，不妨向大波膽埋手。