打吡戰逆轉熱刺士氣盛
今晚英超快車重頭戲，曼聯喺奧脫福主場火併阿仙奴。紅魔今季遇強腳仔軟，防線又傷兵滿營，主帥莫連奴繼續「百彈齋主」上身，令軍心不穩，相反阿仙奴啱啱喺北倫敦打吡熱血反勝，士氣大振，挾近19場不敗之勢，今仗仲有得受讓咁筍，下盤不容錯過。
（Now 621周四凌晨4時直播）
縱然曼聯陣內有「渣古」盧卡古、阿歷斯山齊士、安東尼馬迪爾、拉舒福特等進攻好手，但始終未能產生化學作用，其中「渣古」近13次為「紅魔鬼」披甲入得1粒咁大把，上仗仲要踩波車，冇晒信心，另一射手阿歷斯山齊士，最近更加重創長抖，最快要到明年1月才有望復出，令進攻過於單調，今季聯賽先後與熱刺、車路士及曼城等BIG 6球隊交手，只得1和2負，一旦遇強往往只識死守，最終久守必失。
曼聯殘陣內亂遇強腳軟
除此之外，曼聯係連防線都勁多傷停，除咗域陀連迪路夫要抖到聖誕節外，勞基梳爾上仗都受傷，艾舒利楊格今仗亦要坐波監，依家要寄望之前傷緊嘅基斯史摩寧、達美安、路爾斯華倫西亞可否趕及復出，如果唔得就要中場尼曼查馬迪及麥湯米尼客串，認真牙煙。主帥莫連奴嫌唔夠亂，仲批評中場保羅普巴常扭失波係球隊病毒，呢位法國國腳即反駁，話莫帥嘅戰術限制球員跑動，搞到佢傳唔到波，矛盾日深。
相反，阿仙奴自今季獲主帥艾美利入主後，一改失球後即崩潰嘅軟弱球風，上場北倫敦打吡反勝熱刺4比2，激情四射，充分顯示一眾「槍手」鬥心爆燈，一洗以往遇強即屈嘅頹勢，今季6場聯賽作客取得4勝，與上季19場客場亦只得4勝相比，「客場蟲」毛病已醫得七七八八。
阿仙奴各項賽事19戰不敗
雖然阿仙奴中場悍將格列沙加今仗要停賽，但艾帥擅於變陣，上仗對熱刺落後1比2嗰陣，佢易邊後即刻撳掣，換入拿卡錫迪及艾朗藍斯，前者攻入1粒，後者交出2次助攻，成為反勝關鍵，而喺拿卡錫迪出場後起到牽制作用，令奧巴美揚有更多空位發揮，難怪「兵工廠」喺各項賽事已連續19場不敗，加上剛贏打吡戰軍心大振，造訪紅魔未驚過，仲有得受讓平半，梗係捧下盤。