水手6戰場場失波未贏過
周五有場澳職獨腳戲，西悉尼流浪者主場迎戰中岸水手。積分榜包尾嘅中岸水手開咧至今1勝難求，表現曳到爆，相反西悉尼流浪者雖排尾三，不過主場出擊鬥心十足，主勝咪錯過。
（Now 639、有線615及655台周五下午4時50分直播）
中岸水手除咗喺季前大搞噱頭，請嚟「百米飛人」保特試腳之外，其實仲揾咗曾經喺13/14年度球季、帶領布里斯班獅吼搶得雙料冠軍嘅教頭麥克莫維執教。雖然來頭唔細，不過呢位主帥似乎仲未幫到球隊揾出贏波方程式。新一季水手表現低迷，而且愈踢愈沉，開咧6戰2和4負，在積分榜排名墊底。尤其水手後防甩漏問題嚴重，6仗場場都有失波，加上兩位前場主力哥利加美路同湯馬士奧亞因傷倦勤，令進攻火力大減，目前球隊前後都冇貨交，今場作客更唔樂觀。
西流珍惜主場冧粉絲
另一邊廂，西悉尼流浪者雖然聯賽只係贏過1場，不過當中有4仗都係作客，另外仲有1場移師中立場進行，嚴格嚟講，西悉尼開咧至今只喺自己地頭踢過1場比賽，所以今次返回主場出戰，加上得到球迷撐場下，士氣同戰意肯定有保證，面對聯賽慘吞4連敗嘅中岸水手，相信主帥巴布有能力帶領流浪者走出上輪輸波嘅陰影，1.5倍主勝值得捧場。