今日澳職上演3場大戰，波童一次過推介3場畀大家，玩單頭或過關任君選擇。頭場FC悉尼主場鬥威靈頓鳳凰。鳳凰近4場聯賽1和3負，而且近5次對FC悉尼輸4次，作客凶多吉少；FC悉尼近4次擊敗鳳凰都係上半場已領先，如嫌主W太熱，可捧半場主勝。
（Now 639、有線655及615台周六下午2時35分直播）
勝利吼大光輝秤先
第2場有墨爾本勝利主場鬥阿德萊德聯。勝利上場以4比0大破西悉尼流浪者，日本中場本田圭佑又有進帳，個人今季已有4個入球及3個助攻，加上另一位中場安東尼斯亦累積3個入波，令勝利暫時以14球成為澳職進攻火力最強球隊。不過阿聯近況亦唔錯，繼早前於澳足盃決賽擊敗FC悉尼封王，近4場聯賽亦取得3勝1負，總計聯賽及盃賽，阿聯今季5場作客全勝兼入11球，作客有本錢跟主隊鬥攻，捧2.5球大盤好路。
（Now 639、有線655及615台周六下午4時50分直播）
最後珀斯光輝主場鬥墨爾本城，光輝開季6戰未輸過，狀態托弗，而且佢哋近4次主場鬥墨城贏3次，小讓平半上盤值得支持。
（Now 638、有線654及614台周六晚7時直播）