和都留級唔同你急
日職/日乙附加賽決戰今午爆發，日職尾三嘅磐田山葉，主場迎戰日乙升班附加賽勝方東京綠茵，由於雙方同樣守優於攻，佔盡地利人和嘅磐田，打和都可以留級，呢場波開出半場和嘅機會甚高。
（有線662及602周六下午1時直播）
近3年兩隊天各一方，連盃賽都未碰過頭，但係睇番2015年以前交手，磐田喺山葉主場食到綠茵一戙都冇，6次對戰取得4勝1和1敗，顯然磐田喺自己地頭打綠茵比較有把握。何況今場波啲飛兩日前就畀磐田躉搶購一空，綠茵球員將會面對主場球迷聲勢浩大嘅噓聲，更加容易震騰騰。
根據賽制，打和由日職球隊勝出，而和波都可以留喺日職嘅磐田，有中村俊輔、大久保嘉人呢啲過氣國腳在陣，理論上逐個秤都贏到綠茵，問題係佢哋唔只節奏慢，啲巴西外援又表現麻麻，艾達頓杜斯山度士、加比爾摩碧克真係坐多過踢，基本上旨意晒川又堅碁一個數胡，好易畀人凍結，今季射門成功率得7.7個巴仙，就說明磐田點解34場聯賽只入35球，成為日職攻擊力次弱嗰隊。
東京綠茵守優於攻
非勝不可嘅綠茵就靠防守搵食，聯賽42戰失41球，係日乙防守次佳，不過56個入波又係日乙前8名次差，雖則話中場內田達也今場停賽刑滿復出，可以填補傷兵泉澤仁個位，綠茵算得上係夫添，但係佢哋踢日乙都只得場均11.6次射門，屬於聯賽下游水準，對住日職球隊，想發動狂攻亦有心無力。
基於大家都缺乏強攻致勝本錢，呢個禮拜日日閉門操練嘅磐田，多數採取守株待兔方式，等急於求勝嘅綠茵嚟攻至打反擊，半場好易陷入膠着，1.88倍半場和比較抵玩。假如真係中咗，下半場走地可以諗磐田1.74倍第一隊入球，事關到時急嘅實係綠茵，谷得太前，可能暴露更多空位畀磐田偷到雞。