睇番英超賽程，可以見到賽會為照顧周中要出戰歐戰嘅球隊，實在係出盡心思，皆因佢哋都被編排喺今晚同周日凌晨將會先後出戰，咁嘅安排之下，球隊踢歐戰之前就可以抖多日，對英超球隊喺歐戰嘅表現肯定有好大幫助。除此之外，英超仲未推行歇冬期，其實想喺其他聯賽休賽時候做獨市生意，睇得出英超賽會嘅用意。
卡城修咸頓和味濃
今晚英超大戰連場，其中利物浦作客面對般尼茅夫；歐聯出線形勢告急嘅「紅軍」，下周中要硬撼勁敵拿玻里，為爭入淘汰賽許勝不許敗，肯定會出盡全力迎戰，變相今場聯賽寧可收起主力，勸喻想用真金白銀支持愛隊嘅紅軍球迷，真係要三思。相反個人對其餘幾場賽事更有心水，當中英倫兩支南邊城市球隊––卡迪夫城主場同修咸頓狹路相逢，我就認為「和味濃」，另外車路士主場對曼城、李斯特城主場挑戰熱刺，我都覺得好大機會和局收場，3場比賽用作過關適合不過。
筆者近日同唔少身邊曼聯擁躉閒聊，佢哋都異口同聲向我抱怨，認為紅魔領隊莫連奴根本發揮唔到球員嘅能力，其中高價引入嘅盧卡古同中場保羅普巴，仲因此陷入低迷，咁嘅情況下，相信各地魔迷都好希望球會可以盡快解僱寸王。可惜事與願違，球會高層唔會輕易賠償巨額違約金，加上曼聯歐聯順利出線等因素，都為莫帥增加留任籌碼。所以除非曼聯主場對富咸再失分，否則呢班憤怒嘅魔迷，都唔使旨意願望成真。