「藍月亮」弗到震
今晚英超尾場，車路士主場硬撼曼城。「藍月亮」曼城近期勢如破竹，除聯賽保持15仗不敗，其得失球差（+38球）更打破125年來紀錄，反觀車仔領隊沙利蜜月期已過，近期防線開始露餡，樂比建議捧中位數2.5/3球嘅大盤。
（Now 621周日凌晨1時30分直播）
曼城上季以破英超紀錄嘅100分同射入106球封王，平均每場攻入驚人嘅2.79球，估唔到今季表現更上一層樓，踢咗15場聯賽已經轟入45球，即係平均每場入3球；如果以今場盤口計算，單靠佢哋一己之力都有能力開出大盤。
曼城王者得以延續，教練哥迪奧拿可謂功不可沒，因為佢已建立咗一套穩健體系，踢法上唔會倚賴個別球員，即使有人受傷或輪換，都唔會影響隊波演出。睇番45個入球之中，共有11個球員入波，分布相當平均，加上曼城兵源本身相當充裕，完全睇唔出有任何滑落嘅迹象。
至於車路士今季由沙利執教後有個好開始，一度保持聯賽12場不敗，但對親強隊就見真章；今季對Big6球隊全部有失波，當中遇上曼聯、阿仙奴及熱刺都失2球或以上，其中上月尾對熱刺更係被技術性擊倒，可見防線存在唔少問題。
藍戰士鹵莽守衞多
為咗保留實力踢今場大戰，車仔周中快車賽事更收起咗幾名主力，結果再次爆冷以1比2不敵狼隊。其實車仔今季前線可算保持水準，至今平均每場都攻入超過2球，畢竟陣中王牌夏薩特仍保持佳態，不過車仔最大問題係來自防線，大衞雷斯及魯迪格都屬於鹵莽輕出型，安達斯基斯坦臣又未上到一線水平，搞到今季對親強隊都甚多甩漏。最大鑊係為咗遷就中場大腦佐真奴費路，尼高路簡迪被迫移到右路位置，令防守能力大減，今仗對住入波當食生菜嘅曼城，睇怕又會上演入球騷，大盤要得過。