除咗「1哥」巴塞，西甲「2哥」西維爾今晚亦會亮相，作客勇闖「蝙蝠洞」鬥華倫西亞。主隊「蝙蝠軍團」今季鋒線啞火，屬西甲攻力最弱之一，加埋主力射手洛迪高摩連奴整親上陣成疑，面對近期進攻同樣唔多順嘅西維爾，一於強捧中位數2.5球嘅細盤！
（Now 632周六晚11時15分直播）
巴舒亞伊未能融入
華倫同西維爾嘅對決以往屬西甲強勁戲碼，可惜今季華倫唔爭氣，聯賽14戰只獲3勝暫排第14位，戰績令人大跌眼鏡。尤其一班前鋒好似唔識入波咁，聯賽至今只入得11球，係西甲入球數最少球隊之一，被寄予厚望嘅比利時前鋒巴舒亞伊，遲遲融入唔到球隊，表現完全唔對辦，加上主力前鋒洛迪高摩連奴有傷，就算上得陣都未必夠弗，進一步削弱華倫鋒力，好在呢班波後防尚算穩健，14輪聯賽有12次總入球２球或以下，堪稱細盤專家。
西維爾早前曾一度力壓巴塞過「1哥」癮，但表現始終欠穩定，好似上仗西班牙盃對住低組別球隊維拉奴雲斯，都係僅贏1粒，面對守得穩嘅「蝙蝠軍團」，兩軍隨時陷入膠着，中位數2.5球細盤屬好路之選。