作客走樣＋傷兵困擾
今晚深夜西甲榜首巴塞隆拿作客愛斯賓奴上演加泰羅尼亞打吡。巴塞近期夠晒飄忽，近4場聯賽作客只1勝，加上飽受傷兵問題困擾，對住近年主場出戰打吡都有好表現嘅「愛奴」，2.5球細盤係投注首選。
（Now 632周日凌晨3時45分直播）
巴塞啱啱重奪榜首之位，但現時只係領先次席西維爾1分，同排第5嘅皇家馬德里亦只得5分差距，優勢絕對唔明顯。「地上最強」未能拋離列強，主因係佢哋今季聯賽作客演出嚴重走樣，近4仗作客只得1勝，對住榜下游嘅華倫西亞及雷加利斯都試過失分，加上今場續有沙治羅拔圖、拉芬拿艾簡達拿、烏姆迪迪及馬爾甘因傷倦勤，加上箭頭烏拉圭國腳蘇亞雷斯右膝傷患情況好唔理想，目前只係定期用幹細胞保守療法拖住，明夏好可能要開刀根治，就算今仗勉強上陣，亦唔慌有好表現，所以都唔使點旨意佢。喺陣容不整下，相信巴塞隆拿目標只願全取3分，唔會刻意強求大炒。
愛斯賓奴打吡夠肉緊
唔計熱身賽，愛斯賓奴近9次主場對巴塞雖只得1勝4和5負，但只有1次試過淨輸3球，其餘8次全開2球或以下，當中近5次有4次半場踢成0比0，戰情絕非一面倒；「愛奴」今季主場出色，7次主場出擊獲6勝1負，球員絕對有信心同「地上最強」周旋，死纏爛打下入波唔慌多，2.5球細盤值博。