聖人新帥 開賽前先賣口乖

修咸頓搵哈辛侯治接替曉士做新領隊，今日第一擊作客卡迪夫城（Now 625周六晚11時直播），唔少人對佢有啲期望。51歲嘅奧地利人哈辛侯治同「聖人」簽咗2年半約，呢名有料之人曾經執教德甲RB萊比錫，喺16/17球季攞到德甲亞軍，只係輸畀拜仁慕尼黑，當年RB萊比錫壓過多蒙特同賀芬咸等，所以佢份履歷絕對見得人。修咸頓周中作客熱刺，哈辛侯治都係座上客，佢話最印象深刻係球迷們由頭到尾嘅支持，佢希望自己帶領之下，球隊可以踢好波畀球迷睇，咁快賣口乖果然識撈。