英超早場由性感足球掛帥嘅般尼茅夫主場迎戰利物浦。般尼茅夫近7場全開3球或以上，碰啱紅軍後防大將祖高美斯受傷要抖6周，啱晒般尼茅夫大無畏嘅進攻模式，幸好紅軍開季聯賽15戰12勝3和，繼續刷新球會最佳開季成績，守唔掂就不如同般尼茅夫鬥攻，中位數2.5球入球大隨時半場有錢收。
（Now 621周六晚8時30分直播）
紅軍周中以3比1輕取般尼，繼續保持對榜首曼城嘅威脅，雖然「進攻三叉戟」穆罕默德沙拿、羅拔圖法明奴及沙迪奧文尼表現不及去季，但新兵梳頓沙基利、後備史杜列治及奧歷治每次落場都有不俗表現，令紅軍有更多進攻板斧。不過紅軍陣前迎來壞消息，今季表現穩定嘅祖高美斯受傷，原本仲有華基爾雲迪積克，搵其他人頂可能防守力只係減弱少少，但可惜高普可能焗住要用洛夫雲，呢名克羅地亞後防出名計時炸彈，般尼茅夫絕對有機可乘。
般尼茅夫主場旺入波
般尼茅夫周中主場以2比1擊敗哈特斯菲爾德，終止聯賽4連敗頹勢，不過般尼茅夫今季聯賽4次對Big6雖全敗，但當中3次有士哥，遇強亦不畏縮。般茅近7場全開3球或以上，加上般茅今季11場主場比賽只有1場交白卷，而且對上5次對住紅軍都開出入球大，今場記得早啲開電視，隨時開波無耐就有波入，大家等睇入球騷啦！