誓保主場全勝金身
本周德甲壓軸戲，慕遜加柏主場迎戰尾三史特加，兩軍實力懸殊，慕遜加柏上輪作客不敵實力相當嘅RB萊比錫，反而會激起佢哋鬥心，誓保今季主場全勝紀錄，以史特加嘅實力好難偷雞，慕遜加柏讓一球撐上盤。
（Now 670、Fox+周一凌晨1時直播）
慕遜加柏今季成績比預期更好，除咗因為唔需要分心歐洲賽事，亦因為買到把握能力極強嘅法國射手柏利亞，令佢哋好多時喺拉鋸嘅情況下往往都能夠打破悶局，佢哋今季喺德甲主場6戰全勝共轟入18球，每仗最少都入到兩球，火力強勁。除柏利亞外，前線仲有弗到漏油嘅杜根夏薩特孭重飛，今仗教練赫基打算畀傷愈後連場踢足嘅隊長史甸度輪休，但正好畀機會另一鋒將拉菲爾基達奴爭取表現。以慕遜加柏嘅陣容深度，根本有條件兼顧歐洲賽，依家只係專注德甲，自然可以較長時期保持高水準。
史特加經過災難開局後換帥，新帥韋恩薛亞上任後雖然贏過兩場波，但對手只係紐倫堡同奧格斯堡呢啲下游球隊，呢班波充斥太多過氣國腳同質庸新人。
史特加地莊人腳惡唔出樣
史特加高層亦明白到要開始為護級而付出，提出以破球會紀錄嘅1,200萬歐元借用費，希望多蒙特放翼鋒積及拿臣嚟幫忙踢到季尾，可惜多蒙特教練法夫爾對呢位丹麥國腳仲重視過美國神童基斯甸普列錫，結果拒絕放人，而且遠水難救近火，史特加只能以地莊人腳踢到歇冬，今仗連甚具效率嘅中場艾斯卡斯巴都停埋賽，相信幾難抵擋慕遜加柏強攻。