意甲今輪壓軸戰AC米蘭於主場迎戰拖連奴，拖連奴堪稱AC嘅「私房菜」，近22次對碰AC保持不敗，包括近5次喺聖西路球場出擊，AC米蘭獲4勝1和壓倒性佳績，真係睇數據都知買邊瓣，加埋今場有前鋒希古恩停賽期滿可復出，鋒線實力增強，1.69倍主勝相當抵玩！
（Now 638、有線614及654台周一凌晨3時30分直播）
要數番拖連奴上次贏到AC米蘭，已經係2001年11月嘅事，即係話足足17年之多，依家AC米蘭正選門將基安盧基當拿隆馬，當時只係一個兩歲幾嘅BB，你話幾咁遙遠，現任AC米蘭主帥加度素當時亦有份踢呢場波。
希古恩刑滿復出數胡
不過加度素今場唔使擔心球隊會重蹈覆轍，皆因阿根廷前鋒希古恩兩場波監期滿，今仗可復任正選數胡，同柏德列古度尼雙箭頭攻堅，另一射手波連尼亦有喺上輪歐霸盃入波，配合蘇索及基斯爾等進攻中場，AC火力完全唔需要擔心。拖連奴作客之餘，上周中又要踢意大利盃，體力上相對輸蝕，睇怕今場AC又可開餐食「拖羅」。