今日下午日本天皇盃上演王者之戰，由浦和紅鑽火併仙台維加泰。紅鑽喺今屆日皇盃表現突出，而且今仗東京國立場改建，編排喺埼玉體育場舉行，變相有主場之利，加上近年交手剋死維加泰，1.59倍主勝有買趁早。
（周日下午5時開賽）
紅鑽一向擅踢盃賽，上年勇奪亞冠盃，喺今屆日皇盃一樣出色，5戰全勝之餘，當中更有4場冇失波，包括4強以1比0淘汰應屆亞冠盃盟主鹿島鹿角，總計聯賽及盃賽，紅鑽近11場8勝1和2負，狀態弗爆。今次係紅鑽第11次打入日皇盃決賽，過去10次紅鑽6度封王，而且今屆比賽喺紅鑽慣用主場埼玉體育場上演，地利上紅鑽亦有絕對優勢。
維加泰係盃賽決賽新丁
相反，仙台維加泰創會30年來，從未入過盃賽決賽，經驗輸蝕，佢哋喺今季34場日職失咗54球，仲係聯賽失球第3多球隊添。睇番維加泰今屆5場日皇盃有3次遇上日乙兵，另外2場對手分別為橫濱水手及磐田山葉2支護級隊，表現唔夠紅鑽咁具說服力。兩軍近7次正面交鋒，紅鑽豪取6勝1和佳績，單計主場更4戰全勝狂轟14粒，包括上季大炒7比0，今場一於撐紅鑽主勝捧盃。