早前因小保加球員受襲延期嘅南美自由盃決賽次回合，經歷多次擾攘之後，香港時間周一凌晨會移師中立場西班牙馬德里舉行。首回合主場同河床打成2比2嘅小保加，近期出戰自由盃開局都好搶攻，加上隊中射手當旺，呢場肯定先下手為強，一於撐佢哋「第一隊入球」。
（有線602及662台周一凌晨3時30分直播）
呢項南美球會最高級別嘅賽事之所以被命名為自由盃，其實係向18至19世紀拉丁美洲獨立戰爭期間，一班浴血奮戰，為南美洲爭取脫離西班牙等宗主國殖民統治嘅烈士致敬，背後極具歷史意義。
泰維斯撻着有料到
可惜呢場原本屬於阿根廷、甚至全南美洲嘅足球盛會，由於小保加球員早前被催淚彈襲擊，搞到原定由河床主場出擊嘅次回合賽事未能如期舉行，之後南美足總仲為咗豐厚電視轉播收入，將比賽移師西班牙馬德里再戰，呢個決定即刻激嬲唔少南美球圈人士，皆因呢次選址根本違背咗賽事本身嘅象徵意義，連小保加名宿列基美都睇唔過眼，直言咁嘅決定係荒天下之大謬，仲寸呢場波好似貴價嘅友誼賽添！
撇除場外紛爭，呢場小保加對河床嘅「超級打吡戰」決賽戲碼的確好吸引，兩隊死對頭每次交手都鬥到難分難解，今次首回合喺小保加主場踢，雙方就打成2比2激到爆。睇番小保加近5次出戰自由盃，4次都先取得入波，呢場有弗爆射手賓尼迪圖同泰維斯壓陣，唔想和波踢加時，隨時一開波就搶韁，小保加第一隊入球值博。